नगरपंचायत आणि नगर परिषदेच्या निवडणुकीत महायुतीमधील पक्षांनी सर्व नियम धाब्यावर बसवत आदर्श आचारसंहितेचा सर्रास भंग केलाय. गैरप्रकारच्या २५ नाही तर २५ हजारांपेक्षा जास्त तक्रारी झाल्या आहेत. आजच्या निवडणुकीत सत्ताधारी पक्षाचे ‘पैसा फेक तमाशा देख’, वगनाट्य रंगले, अशी टीका महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केलीय. अनेक ठिकाणी बोगस मतदार सापडले तर अनेक ठिकाणी कार्यकर्त्यांकडून पैसे वाटल्याचे प्रकार उघडकीस आलेत.

येवला येथेही नगराध्यक्ष झालेल्या मतदानावेळी पैसे वाटप झाल्याचा प्रकार उघडकीस आला. येथे शिवसेना शिंदे गटाचे नगराध्यक्ष पदाचे उमेदवार रूपेश दराडे यांचे कार्यकर्ते पैसे वाटप करत होते. तेथील लोकांनी दराडे यांच्या कार्यकर्त्याला रंगेहाथ पकडलं. त्यानंतर मतदान केंद्राच्या जवळच त्याला लोकांनी चांगलाच चोप दिला. नागरिकांनी चोप देत कार्यकर्त्याला पोलिसांच्या स्वाधीन केलं