विज्ञानकथांमधूनच पाहायला, वाचायला आणि ऐकायला मिळणाऱ्या गोष्टी प्रत्यक्षात उतरल्या आहेत. आकाशात कार उडतील आणि आकाशातही थरार बघायला मिळेल, हे फक्त आपण इमॅजिनच केलं आहे. पण खरंच आकाशात कार उडल्या तर?.... कसली धम्माल ना.. जमिनीवर पायच ठेवणार नाही कुणी. सगळेच आकाशातून प्रवास करतील. ट्रॅफिकचीही कटकट नाही. याशिवाय काही तासांचं अंतर काही मिनिटांतच पार करता येईल. हो ना...आता ही फक्त कल्पनाशक्ती नाही. तर प्रत्यक्षात कार आकाशात उडाल्या आहेत.

अमेरिकेतील टेक्सास राज्यात जेस्टन एअर गेम्समध्ये प्रथमच उडणाऱ्या कारची शर्यत घेण्यात आली. ‘आकाशातील फॉर्म्युला वन’ म्हणून ओळखल्या गेलेल्या या रेसमध्ये जेस्टन वन नावाच्या वैयक्तिक इलेक्ट्रिक एअरक्राफ्टचा वापर करण्यात आला आहे. रेसदरम्यान चार पायलटांनी हवेतच बनवलेल्या ट्रॅकवर एकमेकांना मागे टाकण्याचा प्रयत्न केला. ही शर्यत भविष्यातील अशा स्पर्धांचा आराखडा दाखवण्यासाठी आयोजित केल्याचे कंपनीने सांगितलं आहे. कंपनीचे सहसंस्थापक तोमाझ पाटन यांनी देखील या रेसमध्ये भाग घेतला होता.