अक्षय बडवे, साम टीव्ही | पुणे

प्रसिद्धीसाठी कायपण! असा अॅटिट्यूड असलेल्या पुण्यातील त्या स्टंटबाज तरूणी आणि तरुणांच्या अडचणीत वाढ होणार आहे. या स्टंटबाज तरुणीची ओळख पटली आहे. जीव धोक्यात घालून स्टंट करणाऱ्या या तरुणीसह तिच्यासोबतच्या तरुणांना पोलिसांनी समज दिली आहे.

पुण्यातील एका इमारतीच्या छताला लटकून ही तरूणी स्टंट करत होती. तिच्यासोबतच्या एका तरुणानं तिच्या हाताला पकडले होते. तर त्याच्या मदतीने ही तरूणी इमारतीच्या छतावरून खाली उतरली आणि त्याच्या हाताला लटकली होती. तर बाजूलाच असलेला तरूण ही सगळी स्टंटबाजी शूट करत होता. हा व्हिडिओ प्रचंड व्हायरल झाला होता. त्यानंतर जीव धोक्यात घालून रील्सकरिता स्टंट करणाऱ्या अशा तरुणांवर पोलिसांनी तात्काळ कारवाई करायला हवी, अशी मागणी होऊ लागली होती.

पोलिसांनी या प्रकाराची गंभीर दखल घेतली. त्यांचा शोध सुरू केला. अखेर या स्टंटबाज तरूणांची ओळख पटली. दोघेही अॅथलिट असल्याची माहिती समोर आली आहे. हा व्हिडिओ एप्रिलमधला असल्याची माहिती या तरुणांनीच दिली. पोलीस या सर्व घटनेचा तपास करत आहेत. न्यायालयाच्या मदतीने या दोघांविरोधात कलम ३०८ म्हणजे आत्महत्येचा प्रयत्न केल्याचा गुन्हा दाखल होऊ शकतो का, यासाठी प्रयत्न करत आहेत.

पुण्यातील स्वामी नारायण मंदिराजवळ असलेल्या एका इमारतीच्या छतावर हे तरूण जीवघेणा स्टंट करत असल्याचा व्हिडिओ व्हायरल झाला होता. काही दिवसांपूर्वीच पुण्यातील एका तरुणीचा व्हिडिओ सोशल मीडियावर व्हायरल झाला होता. ती मुलगी भरधाव दुचाकीवर हात सोडून स्टंट करत होती.