मुंबईकरांनो, तुमच्यासाठी महत्त्वाची बातमी आहे. पश्चिम रेल्वेने रविवारी, ९ नोव्हेंबर २०२५ रोजी सांताक्रूझ ते गोरेगाव दरम्यान पाच तासांचा जम्बो ब्लॉक जाहीर केला आहे. रेल्वे रुळ, सिग्नलिंग आणि ओव्हरहेड उपकरणांच्या देखभालीसाठी हा ब्लॉक आवश्यक असल्याचे पश्चिम रेल्वेने म्हटले आहे. ब्लॉक सकाळी १० ते दुपारी ३ या वेळेत अप आणि डाऊन धीम्या मार्गावर असेल.

या काळात सर्व धीम्या लोकल जलद मार्गावरून धावतील, त्यामुळे त्या विलेपार्ले आणि राम मंदिर स्थानकावर थांबणार नाहीत. तथापि, प्रवाशांसाठी दिलासादायक बाब म्हणजे या वेळेत हार्बर मार्गावरील सेवा या स्थानकांवर नियमितपणे सुरू राहतील. प्रवाशांनी प्रवासाचे नियोजन करण्यापूर्वी रेल्वेच्या नवीन वेळापत्रकाची माहिती घ्यावी, असे आवाहन रेल्वे प्रशासनाने केले आहे.