वाशिम जिल्ह्यात दोन दिवसात झालेल्या मुसळधार पावसाने नदी नाल्यांना मोठ्या प्रमाणात पूर आला होता. यात वेगवेगळ्या तीन ठिकाणी अडकलेल्या पाच जणांना रेस्क्यू करून वाचवण्यात आले. यात रिसोड तालुक्याच्या पेडगाव येथे पैनगंगा नदीच्या पुरात अडकलेल्या दोन शेतकऱ्यांना रात्री उशिरा सुखरूप बाहेर काढण्यात प्रशासनाला यश आले आहे. अक्षय अंभोरे आणि मदन मोरे अशी शेतकऱ्यांची नावे आहेत. हे दोघे शेतकरी शेतात गेले असताना मुसळधार पाऊस सुरू झाला आणि पैनगंगा नदीला मोठा पूर आला. जीव वाचवण्यासाठी दोघे शेतकरी शेतातील एका झाडावर चढले आणि ते दुपारपासून तेथे अडकून पडले होते.

तर दुपारच्या सुमारास कोकसा परिसरात उतावळी नदीला आलेल्या पुरात एक व्यक्ती अडकून पडला होता. त्या व्यक्तीला शिरपूर पोलीस प्रशासन आणि नागरिकांच्या सहकार्याने सुखरूप बाहेर काढण्यात आले. तर उतावळी नदीच्या पुरात जोगेश्वरी शेत शिवारात सुद्धा दोन शेतकरी पुरात अडकून पडले होते यांना सुद्धा शिरपूर पोलीस आणि नागरिकांच्या मदतीने सुखरूप बाहेर काढण्यात यश आले आहे. संत गाडगेबाबा रेस्क्यू टीम, पिंजर यांच्या मदतीने बचाव कार्य सुरू करण्यात आले. बोटीद्वारे बचाव मोहीम राबवून दोन्ही शेतकऱ्यांना सुरक्षित बाहेर काढण्यात यश आले आहे.