वाशिम जिल्ह्यात गेल्या २० तासांपासून सुरू असलेल्या मुसळधार पावसामुळे जनजीवन विस्कळीत झालं आहे. सततच्या पावसामुळे जिल्ह्यातील नदी-नाले तुडुंब भरले असून अनेक ठिकाणी पूरस्थिती निर्माण झाली आहे.

विशेषतः नागपूर–संभाजीनगर महामार्गावर असलेल्या पिंपरी सरहद्द गावाजवळील उतावळी नदीला पूर आल्याने या पुलावरून मोठ्या प्रमाणात पाणी वाहत आहे. परिणामी, या मार्गावरील वाहतूक पूर्णपणे ठप्प झाली आहे. जवळपास सहा ते सात तासांपासून वाहतूक ठप्प असून दोन्ही बाजूंनी वाहनांच्या लांबच लांब रांगा लागल्या आहेत.

स्थानिक प्रशासन आणि पोलीस यंत्रणा घटनास्थळी असून वाहतूक सुरळीत करण्याचे प्रयत्न सुरू आहेत. दरम्यान, नागरिकांनी सुरक्षित अंतर ठेवावे आणि पूरग्रस्त भागात जाणे टाळावे, असे आवाहन प्रशासनाकडून करण्यात आले आहे.