नीट पेपरफुटीप्रकरणी शिक्षण मंत्री धर्मेंद्र प्रधान यांच्या राजीनाम्याच्या मागणीसाठी दिल्लीतील जंतरमंतरवर सीजेपीचा संस्थापक अभिजीत दिपकेच्या नेतृत्वात तरुणाईचं आंदोलन सुरू आहे. या आंदोलनाला वेगवेगळ्या स्तरांतून पाठिंबा दिला जात आहे. दुसरीकडे, पोलिसांनी आंदोलक विद्यार्थ्यांवर लाठीमार केल्याच्या घटनेमुळे देशभरातून संताप व्यक्त केला जात आहे. त्याचवेळी जंतरमंतरवरील स्टेजवर पोलीस गणवेशात आलेल्या कॉन्स्टेबलने राजीनामा दिल्याचा व्हिडिओ सोशल मीडियावर व्हायरल होत आहे. शेर सिंह असे त्याचे नाव आहे. आपण पोलीस सेवेतील नोकरी सोडत असल्याचे त्याने अभिजीत दिपकेंसमोरच जाहीर केले.

हा व्हिडिओ व्हायरल झाल्यानंतर उत्तराखंड पोलिसांनी या प्रकरणाची दखल घेतली. शेर सिंह याला याआधीच पोलीस सेवेतून निलंबित केल्याचे पोलीस प्रशासनाने स्पष्ट केले. शेर सिंह हा पित्तोरगढमध्ये तैनात होता. २८ जूनपासून तो नोकरीच्या ठिकाणी रुजू झालेला नाही. त्यामुळे २० जुलै रोजी त्याला पोलीस सेवेतून निलंबित करण्यात आले आहे, असे उत्तराखंड पोलिसांनी सांगितले.