महिला आयपीएस अधिकारी अंजना कृष्णा यांना उपमुख्यमंत्री अजित पवार यांनी कार्यकर्त्यांच्या मोबाईल फोनवरून तंबी दिल्याचा व्हीडिओ व्हायरल झाल्यानंतर बेकायदेशीर जमाव जमवून गोंधळ घातला व शासकीय कामात अडथळा निर्माण केल्या प्रकरणी राष्ट्रवादी काँग्रेस माढा तालुका अध्यक्ष बाबा जगताप यांच्यासह 15ते 20 जणांवर कुर्डुवाडी पोलिस ठाण्यात गुन्हा दाखल करण्यात आला आहे.

माढा तालुक्यातील कुर्डू येथे बेकायदेशीर गौण खनिज उत्खनन सुरू असल्याची माहिती आयपीएस महिला अधिकारी अंजना कृष्णा यांना मिळाली होती. त्यांनी घटनास्थळी जावून कारवाई सुरू केली. दरम्यान गावातील राष्ट्रवादीच्या काही पदाधिकाऱ्यांनी कारवाई रोखण्यासाठी थेट उपमुख्यमंत्री अजित पवार यांना फोन लावला. कार्यकर्त्यांच्या फोन वरून अजित पवार यांनी आयपीएस अधिकारी अंजना कृष्णा यांना कारवाई करू नका असे म्हणत तंबी दिली. त्यांच्या संभाषणाचा व्हिडिओ व्हायरला झाला आहे.

यावर विरोध पक्षातील अनेकांनी अजित पवार यांच्या कृतीवर आक्षेप घेत टिका केली. तर जनशक्ती शेतकरी संघटनेचे अध्यक्ष अतुल खुपसे यांनी कारवाई करावी अन्यथा जिल्हाधिकारी कार्यालयावर मोर्चा काढू असा इशारा दिला होता. त्यानंतर पोलिसांनी बाबा जगताप नितीन माळी,संतोष कापरे,आण्णा ढाणे यांच्या 15ते 20 जणांवर शासकीय कामात अडथळा निर्माण केला म्हणून कुर्डुवाडी पोलिस ठाण्यात गुन्हा दाखल करण्यात आला आहे. घटना घडल्यानंतर तीन दिवसांनी गुन्हा दाखल करण्यात आला आहे.