विरार शहरात सकाळपासून मुसळधार पावसाने हजेरी लावली असून, शहरातील अनेक भाग जलमय झाले आहेत. राष्ट्रीय महामार्गाला जोडणारा नालासोपारा पेल्हार फाटा रस्ता पूर्णपणे पाण्याखाली गेला आहे.

रस्त्यालगत असलेल्या अनेक दुकानांमध्ये पावसाचे पाणी शिरले असून, व्यापाऱ्यांमध्ये अस्वस्थता पसरली आहे. नागरिक आणि वाहनचालकांना साचलेल्या पाण्यातून वाट काढावी लागत असून, त्यांचा प्रवास अत्यंत धोकादायक ठरत आहे.

काही सतर्क नागरिकांनी गटारांचे झाकण उघडून पाण्याचा निचरा करण्याचा प्रयत्न केला, मात्र पालिकेच्या नाले सफाईच्या दाव्यांची पहिल्याच पावसात पोलखोल झाल्याचं चित्र दिसत आहे. सद्यस्थितीत प्रशासनाकडून कोणतीही ठोस कारवाई करण्यात आलेली नाही, तर नागरिकांनी तात्पुरती खबरदारी घेत आपली वाट शोधण्याचा प्रयत्न सुरू केला आहे.