गेल्या काही दिवसांपासून राज आणि उद्धव ठाकरे हे एकत्र येणार असल्याची चर्चा सुरू असताना आता उद्धव ठाकरे यांनी मोठं विधान केलं आहे. मनसे प्रमुख राज ठाकरे यांनी महेश मांजरेकर यांना दिलेल्या एका मुलाखतीत ते म्हणाले होते की महाराष्ट्राच्या हितासाठी आम्हाला एकत्र येण्याला काही अडचण नाही. आमच्यातले वाद हे क्षूल्लक आहे. यानंतर उद्धव ठाकरे यांनी देखील राज ठाकरेंच्या विधानाला सकारात्मक प्रतिसाद दिला होता. त्यानंतर लगेचच कार्यकर्त्यांकडून दोन्ही ठाकरे बंधूचे बॅनर हे एकत्रित लावण्यात आले.

काल देखील नाशिकमध्ये मनसे कार्यालयाच्या उद्घाटनाला ठाकरेंच्या शिवसैनिकांनी हजेरी लावली होती. अशातच आज उद्धव ठाकरे यांची त्यांच्या मातोश्री या निवासस्थानी पत्रकार परिषद पार पडली. यावेळी त्यांना या संदर्भात प्रश्न विचारला असता ते म्हणाले की, महाराष्ट्राच्या जनतेच्या मनात जे आहे तेच होईल असं मोठं विधान करून एकप्रकारे मनसे-ठाकरेगट एकत्र येण्याच्या निर्णयाला ग्रीन सिग्नल दिला. आता येणाऱ्या काळात राज्यात काय राजकीय उलथापालथ होतात हे बघण औत्सूक्याचे राहणार आहे.