एफडीएचे आयुक्त तुकाराम मुंढे यांच्या बदलीसाठी ड्रग्ज माफियांकडून २५० कोटी रुपये गोळा करण्याचं काम सुरू असल्याचा धक्कादायक आरोप राष्ट्रवादी काँग्रेस शरद पवार गटाचे आमदार जितेंद्र आव्हाड यांनी केला आहे. दरम्यान, याबाबत आपल्याला काहीही कल्पना नसल्याची प्रतिक्रिया तुकाराम मुंढेंनी दिली आहे. तुकाराम मुंढे यांच्या जीवाला धोका असल्याचे देखील जितेंद्र आव्हाड यांनी सांगितले. एफडीएचे कॅप्टन अशी तुकाराम मुंढे यांची देशभरात ओळख आहे. मुंढेंच्या बदलीबाबत जितेंद्र आव्हाड यांनी केलेल्या दाव्यामुळे राजकीय वर्तुळात खळबळ उडाली आहे.

आमदार जितेंद्र आव्हाड यांनी पावसाळी अधिवशेनादरम्यान माध्यमांशी बोलताना सांगितले की, 'तुकाराम मुंढे यांना उचलण्यासाठी हे ड्रग्ज माफिया , फार्मासिटीकल माफिया २५० कोटी रुपये जमवत आहेत. हे पैसे फक्त तुकाराम मुंढे यांची विकेट काढायला जमा केले जात आहेत. मी सरकारला सांगतो की तुकाराम मुंढेंच्या जीवाचे बरं- वाईट होण्याची शक्यता नाकारता येत नाही.'