ट्रॅव्हल ब्लॉगर ज्योती मल्होत्रा या महिलेला नुकतंच पाकिस्तानी गुप्तचर संस्थांसाठी हेरगिरी केल्याच्या आरोपाखाली हिसार पोलिसांनी अटक केली आहे. अटक केल्यानंतर तिला कोर्टात हजर करण्यात आले. न्यायालयाने तिला पाच दिवसांची पोलीस कोठडी सुनावली असून, सध्या तिची सखोल चौकशी सुरू आहे. पोलिसांकडून सुरू असलेल्या तपासातून अनेक धक्कादायक बाबी समोर येत आहेत. अशातच तपास यंत्रणांच्या हाती आलेल्या व्हॉट्सअ‍ॅप चॅटमुळे प्रकरण अधिक गंभीर होत चालले आहे.

मीडिया रिपोर्टनुसार, ज्योती मल्होत्रा आणि पाकिस्तानच्या आयएसआय एजंट अली हसन यांच्यात व्हॉट्सअॅपवर संभाषण झाले. यात "प्रोटोकॉल" आणि "गुप्तचर" यांसारख्या शब्दांचा वापर झाल्याचे समोर आले आहे. यावरून तपास यंत्रणांना असा संशय आहे की, ज्योतीचा उपयोग भारतातील गुप्तचर संस्था रॉ एजंट्स कोण आहेत, याबाबत माहिती मिळवण्यासाठी केला जात होता. या संभाषणांमुळे ज्योतीच्या हेतूंवर संशयाची सुई अधिक तीव्र झाली आहे. भारतीय गुप्तचर यंत्रणांनी देखील याचा गांभीर्याने तपास सुरू केला आहे.