ठाणे: राज्यात पुन्हा एकदा कोरोनाचे सावट गडद होत असतानाच ठाण्यातील एका तरुणाच्या कोरोनामुळे मृत्यू झाल्याची धक्कादायक घटना समोर आली आहे. कळवा रुग्णालयात उपचार घेत असलेल्या या तरुणाचा शुक्रवारी मृत्यू झाला. या मृत्यूने ठाणेकरांमध्ये खळबळ उडाली आहे.

प्राथमिक माहितीनुसार, संबंधित तरुणाला काही दिवसांपूर्वी कोरोनाची लागण झाली होती. त्यानंतर त्याला तातडीने कळवा रुग्णालयात दाखल करण्यात आले होते. उपचार सुरू असतानाच त्याची प्रकृती खालावत गेली आणि अखेर त्याचा मृत्यू झाला.

ठाणे महापालिका प्रशासनाने या घटनेची गंभीर दखल घेतली असून, संबंधित परिसरात खबरदारीचे उपाय पुन्हा सुरू करण्यात आले आहेत. नागरिकांनी घाबरून न जाता मास्कचा वापर, सोशल डिस्टन्सिंग आणि वैयक्तिक स्वच्छतेच्या नियमांचे काटेकोर पालन करण्याचे आवाहन करण्यात आले आहे.

या मृत्यूमुळे राज्यात पुन्हा एकदा कोरोनाच्या तिसऱ्या लाटेची भीती निर्माण झाली आहे. आरोग्य विभाग व महापालिका प्रशासन सतर्क असून, प्रतिबंधक उपाययोजना अधिक बळकट केल्या जात आहेत.