नाशिकमधून एक मोठी राजकीय बातमी समोर येत आहे. जिथे आगामी महानगरपालिका निवडणुकीसाठी ठाकरे शिवसेना आणि मनसे एकत्र लढणार आहेत. नाशिकच्या मनसे कार्यालयात दोन्ही पक्षांच्या पदाधिकाऱ्यांची बैठक पार पडली. या बैठकीत नाशिक महापालिका निवडणूक ही ठाकरेंची शिवसेना आणि मनसे युतीच्या माध्यमातून लढतील आणि सन्मानपूर्वक जागावाटप देखील दोन्ही पक्षांमध्ये होईल यावर शिक्कामोर्तब करण्यात आले आहे. दोन्ही पक्षांच्या नेत्यांनी या निर्णयाला दुजोरा दिला असून, जागावाटपावर पुढील चर्चा लवकरच होणार आहे. राज्य पातळीवर युतीची घोषणा झालेली नसताना नाशिकमध्ये स्थानिक पातळीवर हे दोन पक्ष एकत्र आल्याने राजकीय वर्तुळात चर्चांना उधाण आले आहे.