पिंपरी चिंचवड शहरातील सायन्स पार्क जवळ एका स्कूलबस आणि आलिशान गाडीचा भीषण अपघात झाला आहे. समोरासमोर जोरदार धडक झाल्याने या अपघातात स्कूल बसमधील दोन विद्यार्थी जखमी झाले आहेत. या विद्यार्थ्यांवरती जवळच्या रुग्णालयात उपचार सुरू असल्याची माहिती पिंपरी पोलीसांनी दिली आहे. पोद्दार इंटरनॅशनल स्कूलचे 15 विद्यार्थी घेऊन ही बस जात होती. सदर घटना दुपारी 12:30 च्या सुमारास घडली असून घटनेदरम्यान भरधाव वेगात आलेल्या गाडीने स्कूल बसला समोरुन जोरदार धडक दिली. आलीशान गाडीने धडक दिल्याच्या अनेक घटना समोर येत आहेत. वरळी मध्ये देखील भरधाव वेगात असलेल्या आलिशान गाडीच्या अपघातात विनोद लाड या व्यक्तीचा सात दिवसानंतर मृत्यू झाला. या घटनेआधी देखील वरळीमध्ये एका भरधाव BMW कारने महिलेला चिरडल्याची बातमी समोर आली होती.