टीसीएसच्या नाशिक शाखेतील तक्रारी, आरोप, धमक्या आदी प्रकरणांची अत्यंत गंभीर दखल कंपनीने घेतल्याचे टाटा सन्सचे अध्यक्ष एन. चंद्रशेखरन यांनी सांगितले. गेले काही दिवस या कंपनीत कर्मचाऱ्यांचा छळ, धर्मांतर झाल्याच्या तक्रारी येत होत्या. यासंदर्भात पोलीस तक्रारही करण्यात आली असून आरोपींना अटकही झाली आहे. याबाबत चंद्रशेखरन यांनी निवेदन प्रसिद्ध केले आहे.

हा प्रकार अत्यंत चिंताजनक आणि उद्वेगजनक आहे. याची अत्यंत गांभीर्यपूर्वक दखल घेण्यात आली आहे. आरोपी कर्मचाऱ्यांवर कारवाई करण्यात आली असून, तपासात पोलीस यंत्रणेला कंपनीकडून पूर्ण सहकार्य करण्यात येत आहे. कर्मचाऱ्यांनी कोणालाही दिलेल्या धमक्या, गैरप्रकार याबाबत टाटा ग्रुप 'झिरो टॉलरन्स' धोरण राबवत आहे. यासंदर्भात सत्य जाणून घेण्यासाठी सखोल चौकशी केली जाईल. टीसीएसच्या चीफ ऑपरेटिंग ऑफिसर आरती सुब्रमणियनही चौकशी करतील. तसेच या संदर्भातील कार्यपद्धतीत सुधारणा आणि आवश्यक उपायोजना यांची अंमलबजावणी काटेकोरपणे केली जाईल, असेही निवेदनात नमूद करण्यात आले आहे.