भाजप आमदार सुरेश धस यांनी त्यांचा कार्यकर्ता सतीश भोसले उर्फ खोक्याच्या कुटुंबाची भेट घेतली आहे. पोलिसांनी खोक्याच्या प्रयागराज येथून मुसक्या आवळल्या होत्या. खोक्या हा अनेक दिवसांपासून पोलिसांना चकमा देत होता. अखेर त्याच्या हाताला बेड्या घालण्यात पोलिसांना यश आले. खोक्याने वनविभागाची जागा हडपून त्या जागेवर बंगला बांधला होता. मात्र वनविभागाने त्या घरावर बुलडोझर चालवला होता. या सर्व प्रकरणावर आमदार सुरेश धस यांनी कारवाईला जरा अतिघाई केली अशी प्रतिक्रिया दिली होती. या कारवाईनंतर आज त्यांनी त्यांच्या कुटुंबाची भेट घेऊन माध्यमांशी संवाद साधला.

सुरेश धस म्हणाले, मीडियाने खोक्याला किती मोठा गुंड केला? त्याला किती मोठा पैसेवाला केला. त्यानंतर वनविभागाने त्याचे घरही पाडले. कोणतीही नोटीस न देता ही कारवाई केली असल्याचा आरोप सुरेश धस यांनी केला. तसेच खोक्याने जो गुन्हा केला त्यासाठी त्याला अटक देखील केली आहे. तो त्याची शिक्षा भोगत आहे. परंतु वन विभागाने कारवाई कुठलीही नोटीस न देता केली आहे.