राजकीय वर्तुळातून एक मोठी बातमी समोर येत आहे. आज सकाळी ११ वाजता शरद पवार यांच्या राष्ट्रवादी काँग्रेस पक्षाचे आठ खासदार पंतप्रधान नरेंद्र मोदी यांची भेट घेणार आहेत. या भेटीसाठी खासदारांनी पंतप्रधान कार्यालयाकडे (PMO) अधिकृत वेळ मागितली आहे. मतदारसंघातील आणि राज्याच्या विकासाचे विविध प्रश्न मांडण्यासाठी ही भेट होत असल्याची माहिती खासदार सुप्रिया सुळे यांनी दिली आहे.

महाविकास आघाडीत बिघाडी? "पवारांचे नेते मोदींच्या दरबारात नतमस्तक"

दरम्यान, शरद पवारांच्या राष्ट्रवादीचे खासदार पंतप्रधान मोदी आणि अमित शाह यांची भेट घेणार असल्यामुळे महाविकास आघाडीत फूट पडल्याच्या चर्चांना उधाण आले आहे. "राष्ट्रवादीचे नेते मोदी-शाहांच्या दरबारात नतमस्तक होत आहेत, नक्कीच त्यांच्यात काहीतरी शिजतंय," असा थेट दावा काँग्रेस नेते विजय वडेट्टीवार यांनी केला आहे. दुसरीकडे, "महाविकास आघाडी भक्कम आहे, कुणीही कुठेही जाणार नाही," असा दावा ठाकरे गटाचे खासदार संजय राऊत यांनी केला आहे.