उद्धव ठाकरे यांच्या शिवसेना पक्षातील सहा फुटीर खासदारांविरोधात पक्षाने शिस्तभंगाची कारवाई सुरू केली आहे. पक्षाच्या बैठकीला गैरहजर राहून पक्षादेशाचे उल्लंघन केल्याचा ठपका ठेवत या खासदारांना कारणे दाखवा नोटीस बजावण्यात आली आहे. या कारवाईमुळे ठाकरे गट आणि उपमुख्यमंत्री एकनाथ शिंदे यांच्या नेतृत्वाखालील शिवसेना यांच्यातील वाद आणखी तापण्याची शक्यता आहे. नोटीस बजावण्यात आलेल्या खासदारांमध्ये मुंबई उत्तर-पूर्वचे संजय दिना पाटील, यवतमाळ-वाशिमचे संजय देशमुख, हिंगोलीचे नागेश पाटील आष्टीकर, परभणीचे संजय जाधव, शिर्डीचे भाऊसाहेब वाघचौरे आणि धाराशिवचे ओमप्रकाश राजेनिंबाळकर यांचा समावेश आहे.