शाळेतील गुरुजींची बदली झाल्याची बातमी कळताच विद्यार्थ्यांना अश्रू अनावर झाले. 'गुरुजी, आमच्या शाळेतून जाऊ नका ना!' पुन्हा येणार ना? असं म्हणत लहानग्यांनी हंबरडा फोडला. गावातील या आदर्श शिक्षकांनी केवळ शिक्षणच नव्हे तर पर्यावरण संवर्धन आणि शाळा विकासासाठीही उल्लेखनीय कार्य केले आहे. उन्हाळ्याच्या सुट्टीतही त्यांनी स्वतः दूरवरून पाणी आणून ५०० हून अधिक झाडांना जिवंत ठेवले. विद्यार्थी, पालक आणि ग्रामस्थांच्या सहकार्याने त्यांनी शाळेची इमारत सुशोभित केली तसेच परिसर विकासालाही गती दिली. त्यामुळे त्यांच्या बदलीने विद्यार्थ्यांसह ग्रामस्थांना मोठी पोकळी जाणवत आहे. समाजात असे समर्पित शिक्षक दुर्मिळ असल्याची भावना व्यक्त होत असून गुरुजींच्या कार्याची आठवण कायम हृदयात राहील, असा सूर उमटला आहे.