परभणी शहरांमध्ये मोकाट जनावरांचा अक्षरशः हैदोस पाहायला मिळत आहे. ठिकठिकाणी हे मोकाट जनावर रस्ता अडवताना दिसत आहे, तर दुसरीकडे शहरातील गजानन नगर भागांमध्ये एका कठाळ्याने २ जणांना धडक देवुन गंभीर जखमी केले आहे. जवळपास २ तास हा कठाळ्या या भागात धुडगूस घालत होता. विद्यार्थी ये जा करणारी वाहन यांच्या मागे धावून जात धडक मारत होता. एक वृद्ध नागरिक या ठिकाणाहून जात असताना अचानक येवून या कठाळ्याने त्यांना धडक मारली ते खाली पडले. त्यांच्या डोक्याला गंभीर इजा झाली असून त्यांना रुग्णालयात उपचारासाठी दाखल करण्यात आले आहे. हा प्रकार सीसीटिव्हीमध्ये कैद झाला आहे. परभणी शहरातील कोणत्याही रस्त्यांवर गेले तर हजारो मोकाट जनावर हे ठाण मांडून बसलेले दिसून येतात. या जनावरांकडे महानगरपालिकेने दुर्लक्ष केल्यामुळे हे जनावर नागरिकांच्या जीवावर उठत आहेत.