गेल्या 12 वर्षांत भाजपच्या नेतृत्वाखालील सरकारमुळे देशाचं मोठं नुकसान झालं आहे, असा गंभीर आरोप काँग्रेसच्या ज्येष्ठ नेत्या सोनिया गांधी यांनी केला आहे. 'द हिंदू' या वृत्तपत्राला दिलेल्या विशेष मुलाखतीत त्यांनी केंद्रातील भाजप सरकारच्या कारभारावर टीका केली आहे. देशातील लोक आता अस्वस्थ झाले असून, देशाचं होत असलेलं नुकसान त्यांच्या लक्षात येऊ लागलं आहे, असंही सोनिया गांधी यांनी म्हटलं आहे. या मुलाखतीत सोनिया गांधी यांनी देशातील लोकशाही, संवैधानिक संस्था आणि सामाजिक सलोख्याच्या स्थितीवरही भाष्य केलं आहे. भाजप-आरएसएसच्या राजवटीत देशाच्या लोकशाही संस्थांना आणि देशाच्या सामाजिक रचनेला मोठा धक्का बसल्याचा आरोप त्यांनी केला आहे.