आगामी विधानसभेची निवडणूक तोंडावर असताना राज्यात मराठा आरक्षणाचा मुद्दा सध्या चांगलाच तापला आहे. मराठा समाजाला ओबीसी प्रवर्गातून आरक्षण द्यावं, या मागणीसाठी मराठा बांधव आक्रमक झाले आहेत. या गोष्टीचा मोठा त्रास राजकीय नेत्यांना होत आहे.

काही दिवसांपूर्वी बीड येथे मराठा आंदोलकांनी मनसे अध्यक्ष राज ठाकरे यांना घेराव घातला होता. यावेळी राज ठाकरे यांनी आंदोलकांची समजूत काढली होती. आता ज्येष्ठ नेते शरद पवार यांची देखील कार मराठा बांधवांनी अडवली. शरद पवार सध्या सोलापूर दौऱ्यावर असून विधानसभा मतदारसंघाचा आढावा घेत आहेत.

आज रविवारी ते बार्शी येथील शेतकरी संवाद मेळाव्याला ते हजेरी लावणार आहेत. या कार्यक्रमाला जाताना टेंभुर्णी कुर्डुवाडी रस्त्यावर मराठा बांधवांनी शरद पवार यांच्या गाडीचा ताफा अडवला. मराठा आरक्षणावर आपली भूमिका जाहीर करा, असा आग्रह पदाधिकाऱ्यांनी धरला. यावर शरद पवार यांनी त्यांची समजूत काढून आमचा तुमच्या मागणीला पाठिंबा आहे, असं सांगितलं.