बार्शी शहरात कोयता घेऊन दहशत माजवण्याचा धक्कादायक प्रकार समोर आला आहे. मोबाईल रिचार्जच्या किरकोळ वादातून एका तरुणाने मोबाईल दुकानात घुसून तोडफोड केली. या संपूर्ण प्रकाराचा व्हिडिओ दुकानातील सीसीटीव्ही कॅमेरामध्ये कैद झाला आहे.

मिळालेल्या माहितीनुसार, आरोपीने आपल्या पत्‍नीच्या मोबाईलवर रिचार्ज केल्यानंतरही सेवा सुरू झाली नसल्याच्या रागातून दुकानदाराला धमकावले. त्यानंतर संतापाच्या भरात हातात कोयता घेऊन दुकानाची तोडफोड करण्यात आली. अचानक घडलेल्या या हल्ल्याने परिसरात भीतीचे वातावरण निर्माण झाले. घटनास्थळी कोयता फिरवत केलेली तोडफोड, काऊंटरवरील साहित्याची उध्वस्त अवस्था आणि दुकानदाराने स्वतःचा जीव वाचवण्यासाठी केलेली धावपळ हे सर्व फुटेजमध्ये दिसून येत आहे. या प्रकरणी बार्शी शहर पोलीस ठाण्यात गुन्हा दाखल करण्याची प्रक्रिया सुरू असून आरोपी फरार आहे. पोलीस निरीक्षक बालाजी कुकडे यांच्या मार्गदर्शनाखाली अधिक तपास सुरू आहे.