नाशिक जिल्ह्यात सप्तश्रृंगी गडावरून कार दरीत कोसळून भीषण अपघात झाला. या भीषण अपघातात ६ भाविकांचा मृत्यू झाल्याची घटना घडली. सप्तश्रृंगी गडावरील गणपती पॉईंटजवळ संरक्षण कठडा तोडून ही कार थेट खोल दरीत कोसळल्याची प्राथमिक माहिती हाती आली आहे. या अपघातातील भाविकांच्या वारसांना ५ लाखांची आर्थिक मदत सरकारने जाहीर केली आहे.

मुख्यमंत्री फडणवीस म्हणाले, 'सप्तश्रृंगी गडावरून कार कोसळून झालेल्या अपघातात 6 भाविकांचा मृत्यू झाल्याची घटना घडली. ही अतिशय दुर्दैवी घटना आहे. अपघातातील मृतांना भावपूर्ण श्रद्धांजली अर्पण करतो. त्यांच्या कुटुंबीयांच्या दुःखात आम्ही सहभागी आहोत. मृतदेह बाहेर काढण्यासाठी मदतकार्य सुरू आहे. अपघातनंतर संपूर्ण यंत्रणा तेथे सज्ज ठेवण्यात आली आहे. या भाविकांच्या वारसांना 5 लाख रुपयांचे आर्थिक सहाय्य सरकारच्या वतीने देण्यात येईल'