बदलापुरातील एका तरुणाला मोबाईल पाहत रस्त्यावरून चालणं चांगलंच महागात पडलंय. या तरुणाला चालता चालता ठेच लागते आणि तो खाली कोसळतो. या घटनेत तरुणाचा हात फ्रॅक्चर झाला असून शरीराला मुका मारही लागलाय. दैव बलवत्तर म्हणून थोडक्यात तरुणाचा जीव बचावला.

रस्त्यावरून जात असताना हा तरुण मोबाईलमध्ये काही तरी पाहत चालला आहे. मोबाईल पाहण्यात गुंग असल्यामुळे त्याला पायाखालचा रस्ताही दिसला नाही. ठेच लागताच हा तरुण खाली कोसळतो. खाली पडताना त्याला सावरण्याची संधी मिळत नाही. अवघ्या काही सेकंदात हा तरुण बाजूला उभी असलेली रिक्षा आणि पायरीच्या कठड्यामध्ये पडतो. या घटनेत तरुणाचा हात फ्रॅक्चर झालाय. तसंच मुका मारही लागलाय.

सुदैवानं या तरुणाचं डोकं पायरीला लागलं नाही अन्यथा त्याला मोठी दुखापत झाली असती. त्यामुळे तुम्ही रस्त्यावरून चालत असताना काळजी घ्या. मोबाईल पाहत रस्त्यावरून चालाल तर तुम्हालाही गंभीर दुखापत होऊ शकते. कदाचित ही सवय तुमच्या जीवावरही बेतू शकते.