एकनाथ शिंदे यांनी उपमुख्यमंत्री व्हावं अशी सर्व आमदारांची इच्छा असल्याचं शिंदे गटाचे आमदार उदय सामंत यांनी म्हंटलं आहे. त्यांनी उपमुख्यमंत्रिपद स्वीकारून सरकारमध्ये सहभागी व्हावं असा आमचा प्रयत्न असल्याचंही सामंत यांनी म्हंटलं आहे. तर भाजपचे नेते गिरीश महाजन यांनी देखील एकनाथ शिंदे यांनी उपमुख्यमंत्री व्हावं, असं म्हंटलं आहे.

विधानसभा निवडणुकीच्या निकालानंतर सत्तास्थापनेच्या नाराजी नाट्याला आज पूर्णविराम लागला आहे. भाजपकडून मुख्यमंत्रिपदाची माळ देवेंद्र फडणवीस यांच्या गळ्यात टाकली आहे. त्यामुळे एकनाथ शिंदे हे उपमुख्यमंत्रिपद स्वीकारतील का? याबद्दल आता चर्चा सुरू झाली आहे. यावर आता शिंदे गटाच्या नेत्यांकडून प्रतिक्रिया येत असून शिंदे यांनी उपमुख्यमंत्रिपद स्वीकारावं आणि सरकारमध्ये राहावं असा प्रयत्न शिंदे गटाचे आमदार करत असल्याचं उदय सामंत यांनी म्हंटलं आहे. तर भाजपचे गिरीश महाजन यांनी देखील याबद्दल बोलताना मागची पाच वर्ष देवेंद्र फडणवीस देखील उपमुख्यमंत्री होते. तसंच आता शिंदे यांनी देखील उपमुख्यमंत्रिपद घेऊन राज्याच्या विकासासाठी काम करावं, असं म्हंटलं आहे. त्यामुळे आता यावर शिंदे काय निर्णय घेतील हे पहाणं महत्वाचं ठरणार आहे.

Edited By Rakhi Rajput