रायगड: छत्रपती शिवाजी महाराजांचा ३५२ वा राज्याभिषेक सोहळा तिथीनुसार किल्ले रायगडावर मोठ्या उत्साहात साजरा होत आहे. देशाच्या कानाकोपऱ्यातून आलेल्या हजारो शिवभक्तांनी रायगडावर हजेरी लावली असून, संपूर्ण गड भगव्या रंगाने न्हाऊन निघाला आहे.

राज्याभिषेकाच्या पूर्वसंध्येला गडावर अभूतपूर्व उत्साह पहायला मिळाला. पारंपरिक वाद्यांच्या गजरात दिवट्या नाचवल्या जात होत्या. अंगारख्यातील तरुण पारंपरिक वेशभूषेत 'शिवगुणगान' गात नाचताना दिसत होते. शिवाजी महाराजांच्या जयघोषात अवघा गड दुमदुमून गेला होता.

गडावरच्या राजसदरेत पारंपरिक दिवट्यांच्या नृत्याने उपस्थित शिवभक्त मंत्रमुग्ध झाले. युवावर्गाने 'शिवरायांच्या' गीतांवर जल्लोषात नृत्य सादर केले, त्यामुळे संपूर्ण परिसर भारावून गेला होता. राज्याभिषेक सोहळ्याच्या निमित्ताने रायगडवर धार्मिक व सांस्कृतिक कार्यक्रमांचे आयोजन करण्यात आले आहे. शिवप्रेमींच्या उत्स्फूर्त सहभागामुळे यंदाचा सोहळा अधिकच देखणा आणि भव्यदिव्य ठरतो आहे.