महायुतीच्या मंत्रिमंडळात डावलण्यात आल्याने राष्ट्रवादी कॉंग्रेस अजित पवार गटाचे ज्येष्ठ नेते छगन भुजबळ हे अद्यापही नाराज आहेत. मात्र आज शिर्डीमध्ये भरलेल्या राष्ट्रवादीच्या अधिवेशनासाठी भुजबळ यांनी उपस्थिती लावली आहे. प्रफुल्ल पटेल आणि सुनील तटकरे यांनी गळ घातली म्हणून मी आलो, मात्र म्हणून नाराजी दूर झाली, असं नाही, अशी प्रतिक्रिया छगन भुजबळ यांनी यावेळी पत्रकारांना दिली आहे.

यावेळी बोलताना भुजबळ म्हणाले की, नाराजी वगैरे दूर झाली असं नाही. हे पक्षाचं शिबिर आहे. कोणत्याही व्यक्तिचं शिबिर नाही. मला काल प्रफुल्ल पटेल हे दोन तास येऊन भेटले. थोडा वेळ तरी तुम्ही शिबिराला यायला हवं असं त्यांनी म्हटलं आणि प्रांत अध्यक्ष सुनील तटकरे यांनी देखील फोन करून मला शिबिराला येण्याची गळ घातली. म्हणून मी आज इथे आलो आहे. मात्र नाराजी दूर झाली असं नाही, असं स्वत: छगन भुजबळ यांनी म्हटलं आहे.