भंडारा: रस्त्यातील खोल खड्डे चुकवण्याच्या प्रयत्नात चालकाचं वाहनावरील नियंत्रण सुटलं आणि स्कूल व्हॅन थेट नाल्याच्या पुलावरून उलटली. या भीषण अपघातात तब्बल 10 विद्यार्थी जखमी झाले असून, एका विद्यार्थ्याची प्रकृती चिंताजनक असल्याची माहिती मिळाली आहे.

ही घटना खमारी-सूरेवाडा मार्गावर घडली. बेरोडी येथील क्रांती ज्योती सावित्रीबाई फुले विद्यालयाचे विद्यार्थी शाळेतून घरी परतत होते. रस्त्यावरील खड्ड्यांमुळे चालकाने वाहन वळवताना व्हॅनचे नियंत्रण सुटले आणि व्हॅन पुलावरून नाल्यात कोसळली.

घटनास्थळी नागरिकांनी तातडीने धाव घेऊन बचावकार्य सुरू केले. सर्व जखमी विद्यार्थ्यांना भंडारा जिल्हा सामान्य रुग्णालयात दाखल करण्यात आले असून किरकोळ जखमी विद्यार्थ्यांना उपचारानंतर सुट्टी देण्यात आली आहे.