साताऱ्यात रक्षकच भक्षक झाल्याची धक्कादायक घटना समोर आली आहे. खाकीतल्या राक्षसांच्या क्रूरतेमुळे एका निष्पाप महिला डॉक्टरचा बळी गेला आहे. फलटण उपजिल्हा रुग्णालयातील या महिला डॉक्टरच्या आत्महत्येनं संपूर्ण महाराष्ट्र हादरला आहे. मात्र ही आत्महत्या आहे की एका निर्दयी व्यवस्थेने केलेला खून हा प्रश्न आता सर्वांच्या मनात घर करतोय. डॉक्टरवर सतत दबाव टाकला जात असल्याचं स्पष्ट होतंय. पोस्टमार्टेम रिपोर्ट बदलावा, असा दबाव तिच्यावर टाकण्यात आल्याचं पत्रात नमूद आहे. पण हा दबाव टाकणारा खासदार कोण? कोणत्या पक्षाशी त्याचा संबंध आहे? आणि या प्रकरणात पोलिसांनी त्या खासदाराचा शोध सुरू केला आहे का हे प्रश्न अद्याप अनुत्तरित आहेत.

महिला डॉक्टरने आपल्या पत्रात स्पष्ट उल्लेख केला आहे की काही वरिष्ठ पोलीस अधिकारी आणि राजकीय दबावामुळे तिला अडचणीत आणण्यात आलं. पेशंट फिट आहे असा अहवाल द्या असा आदेश देण्यासाठी फोन आले, असा गंभीर आरोप तिने केला आहे. या सर्व दडपणाला विरोध केल्यानंतरच तिच्यावर अत्याचार झाल्याची शक्यता नाकारता येत नाही. कोणत्या खासदारच्या पीएने फोन केले होते याचा देखील तपास अजून लागला नाहीये. या घटनेत देखील काही राजकीय वरदहस्त आहे का असे अनेक प्रश्न उपस्थित होत आहे.