आषाढी वारीसाठी शेगाव येथील संतश्रेष्ठ गजानन महाराज यांची पालखी दिंडी पंढरपूरच्या दिशेने मार्गस्थ होत असुन ही पालखी तुळजापूर येथे दाखल झाल्यानंतर तुळजाभवानी मंदीर परीसरात आल्यानंतर मंदीर संस्थानच्या वतीने पालखीचे जल्लोषात स्वागत करण्यात आले. तुळजाभवानी मंदिर संस्थानच्या वतीने तहसीलदार अरविंद बोळंगे यांनी पालखीचे स्वागत केले. यावेळी मंदिर संस्थानच्या वतीने दिंडीतील सर्व वारकऱ्यांसाठी एक वेळच्या जेवणाचा शिधा प्रदान करण्यात आला. गेल्या अनेक वर्षांपासून सुरू असलेली ही परंपरा यंदाही भक्तिभावाने जपली गेली तर वारकऱ्यांच्या उपस्थितीने मंदिर परिसर गजबजून गेला होता. विठुनामाच्या गजराने आणि तुळजाभवानी देवींचा जयघोष करत आलेल्या दिंडीमुळे संपूर्ण तुळजाभवानी मंदिर परिसर भक्तिरसात न्हाऊन गेला होता.