गेल्या काही दिवसांपासून राज्याच्या राजकारणात चर्चेत असलेले शिवसेना (शिंदे गट) आमदार संजय शिरसाट यांनी मोठा गौप्यस्फोट केला आहे. शिवसेना खासदार आणि एकनाथ शिंदे यांचे पुत्र श्रीकांत शिंदे यांनाही प्राप्तिकर विभागाची नोटीस आलीय, असं त्यांनी सांगितलं. प्रसारमाध्यमांशी बोलताना शिरसाट यांनी ही माहिती दिली. आम्ही प्राप्तिकर विभागाला उत्तर देण्यास बांधिल आहोत, असंही ते म्हणाले. मात्र, काही वेळानं शिरसाट यांनी घूमजाव देखील केला.

प्राप्तिकर विभागाकडून छाननी केली जाते. मलाही नोटीस आली आहे. श्रीकांत शिंदे यांनाही नोटीस आली आहे. आणखी कुणालाही नोटीस आली असावी. याचा अर्थ आपण प्राप्तिकर विभागाच्या नोटिशीला उत्तर द्यायचे आहे. ९ तारखेला उत्तर देण्यास सांगितले होते. त्यासाठी मी वेळ मागितली आहे. मी उत्तर देणार आहे, असं त्यांनी सुरुवातीला सांगितलं.

श्रीकांत शिंदे यांना नोटीस आल्याचं सांगितल्यानंतर मोठा गदारोळ झाला. त्यानंतर काही वेळातच शिरसाट यांनी घूमजाव केला. श्रीकांत शिंदेंनाही नोटीस मिळाली की काय, किंवा तुमच्यावर राजकीय दबाव आहे की काय असा प्रश्न विचारण्यात आला. श्रीकांत शिंदेंना नोटीस मिळाली की नाही याची कोणतीही माहिती माझ्याकडे नव्हती. परंतु, श्रीकांत शिंदेंना नोटीस मिळाली असं संजय शिरसाट बोलले असं वाक्य माझ्या तोंडी घालण्यात येत आहे. हा गैरसमज पसरू नये म्हणून हा खुलासा केला आहे, असंही शिरसाट यांनी सांगितलं.