लोकसभा निवडणुकीत महाविकासआघाडीला मोठ्या प्रमाणात यश मिळाले होते. मात्र विधानसभेच्या निवडणुकीत मविआचा दारुण पराभव झाला. यानंतर उबाठा गटाला एकनाथ शिंदे यांनी धक्केवार धक्के द्यायला सुरुवात केली असून अनेक दिग्गज नेत्यांनी ठाकरे गटाला रामराम ठोकत एकनाथ शिंदे यांच्या शिवसेनेत प्रवेश केला आहे.

आगामी महापालिकेच्या निवडणुकीसाठी सर्वच पक्ष आपली कंबर कसत आहे. आगामी महापालिका निवडणुकीच्या पार्श्वभूमीवर ठाकरे गटाला अजून एक खिंडार पडल्याचे पाहायला मिळत आहे.

संजना घाडी या मुंबईतील ठाकरे गटाच्या माजी नगरसेविका आहेत.त्या शिवसेनेच्या उपनेते असून काही दिवसांपूर्वी ठाकरे गटाकडून प्रवक्त्यांंची यादी जाहीर करण्यात आली होती. या यादीत संजना घाडी यांचे नाव नव्हते. त्यामुळे ते नाराज असल्याच्या चर्चा रंगल्या होत्या. त्यानंतर अखेर शेवटच्या क्षणी संजना घाडी यांचे नाव प्रवक्तेपदी जाहीर करण्यात आले होते. त्यामुळे देखील त्या नाराज होत्या. आज त्यांनी शिवसेना ठाकरे गटाला सोडून शिवसेना शिंदे गटात प्रवेश केला असून त्यांच्यासोबत त्यांचे पती माजी नगरसेवक संजय घाडी यांनी देखील शिवसेनेत प्रवेश केला आहे. हा पक्षप्रवेश उपमुख्यमंत्री एकनाथ शिंदे यांच्या उपस्थित पार पडला आहे. संजना घाडी यांनी ठाकरे गटाला जय महाराष्ट्र केल्याने उद्धव ठाकरेंसाठी हा मोठा धक्का मानला जात आहे.