काँग्रेस पक्षाचे निष्ठावान नेते म्हणून ओळखले जाणारे संग्राम थोपटे गेल्या ४० वर्षांपासून अनंतराव थोपटे यांच्या पाठोपाठ भोर (पुणे) मतदारसंघाची धुरा समर्थपणे सांभाळत होते. मात्र, यंदाच्या निवडणुकीत त्यांचा झालेला पराभव हा सर्वांसाठीच एक मोठा धक्का ठरला. यानंतर त्यांनी दोन दिवसपूर्वीच कॉँग्रेस पक्षातील सदस्यत्वाचा राजीनामा दिल्यानंतर अखेर संग्राम थोपटे भाजपमध्ये प्रवेश करणार असून येत्या 22 एप्रिल रोजी ते मुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे यांच्या उपस्थित भाजपमध्ये प्रवेश करतील. आज त्यांनी कार्यकर्ता मेळावा घेत कार्यकर्त्यांची बाजू ऐकून घेतली त्यानंतर त्यांनी पत्रकारांशी संवाद साधला.

यावेळी बोलताना संग्राम थोपटे म्हणाले, विधानसभा अध्यक्षपद एक वर्षाहून अधिककाळ रिक्त होते त्यानंतरही महाविकासआघाडी सरकार कोसळल्यानंतर विरोधी पक्षनेतेपद मिळेल अशी आशा होती. पण सेवाजेष्ठतेचा विचार करून पक्षनेतृत्वाने निर्णय घेतले. पण आता कार्यकर्त्यांची भावना आहे की सलग तीन वेळा मोठ्या शक्तींच्या विरोधात निवडून येवून देखील तुम्हाला राजकीय ताकद दिली जात नाही. त्यामुळे विकासकामांनाही खोडा लागत आहे. म्हणून आता आपल्याला बदलाचा निर्णय घेतला पाहिजे असे कार्यकर्त्यांच म्हणण आहे. आपल्याला डावललं जात आहे. अशी कार्यकर्त्यांची भावना आहे. परंतु शेवटी तालुक्याच्या भवितव्याचा विचार करून आम्ही हा निर्णय घेतला आहे असे थोपटे यांनी सांगितले.