आगामी स्थानिक स्वराज्य संस्थांच्या निवडणुकीच्या पार्श्वभूमीवर नाशिकमधील राजकीय वातावरण तापले आहे. राष्ट्रवादी काँग्रेस अजित पवार गटाचे समीर भुजबळ यांनी मंत्री गिरीश महाजन यांची भेट घेऊन महायुतीत नव्या समीकरणांचे संकेत दिले आहेत. समीर भुजबळ यांनी स्पष्टपणे म्हटले आहे की, 'ते (शिंदे गट) आमचे प्रतिस्पर्धी असल्यामुळे आम्ही त्यांच्याबरोबर युती करू शकत नाही'. भुजबळांनी नांदगाव, मनमाड आणि येवला या तीन नगरपरिषदांमध्ये केवळ भाजपसोबतच युती करण्याचा प्रस्ताव दिला आहे. या प्रस्तावामुळे नाशिकमध्ये महायुतीचा भाग असलेल्या शिंदे गटाला वगळले जाणार का, असा मोठा प्रश्न निर्माण झाला आहे. या घडामोडींमुळे ऐन निवडणुकीच्या तोंडावर महायुतीतील अंतर्गत मतभेद चव्हाट्यावर आले असून, नाशिकच्या राजकारणात मोठा भूकंप होण्याची शक्यता वर्तवली जात आहे.