छत्रपती संभाजीनगरमध्ये मुख्यमंत्री एकनाथ शिंदे यांचा आज दौरा होणार आहे. या दौऱ्यामुळेच पोलिस भरती पुढे ढकलण्यात आली आहे. यावरून शिवसेना ठाकरे गटाचे नेते आणि विधान परिषद विरोधी पक्षनेते अंबादास दानवे चांगलेच संतापले आहेत. मुख्यमंत्र्यांचा दौरा आज ठरला का?, असा सवाल त्यांनी उपस्थित केला आहे. पोलिसांकडे मनुष्यबळ नसल्यामुळे भरती पुढे ढकलण्यात आली आहे. त्यामुळे पोलिस भरतीसाठी आलेल्या मुलांचा खर्च कोण करणार?, त्यांना घरी जाण्यासाठीचा खर्च कोण देणार? असा सवाल दानवे यांनी उपस्थित केला आहे. याबाबत अंबादास दानवे यांनी पोलिस आयुक्तांसोबत चर्चा देखील केली. 'उद्या पोलिस आयुक्तांच्या मनात आले तर भरती बंद , त्यांच्या मनात आले तर भरती सुरू. ही काय रजाकारी सुरू आहे का?, पोलिस आयुक्तांच्या घरचे राज्य चालू आहे का?', असा देखील सवाल त्यांनी उपस्थित केला आहे.