अभिनेता सैफ अली खानला आज ६ दिवसांनी लीलावती रुग्णालयातून डिस्चार्ज देण्यात आला आहे. मुंबईत वांद्रे येथे असलेल्या घरात सैफवर चोराने चाकूने हल्ला केल्याची घटना १६ जानेवारीला घडली होती. यावेळी त्याला ६ जखमा झाल्या होत्या. त्यातील २ जखमा या गंभीर होत्या. त्याच्यावर लीलावती रुग्णालयातच शस्त्रक्रिया करण्यात आली. त्यानंतर तो गेल्या ६ दिवसांपासून तेथे उपचार घेत होता. आज त्याला अखेर डिस्चार्ज मिळाला आहे. यावेळी रुग्णालयातून बाहेर पडताना सैफ कॅमेऱ्यात कैद झाला आहे. पांढऱ्या रंगाचा शर्ट, डोळ्यांना गॉगल असलेला सैफ रुग्णालयातून बाहेर येत आपल्या फॉर्च्यून हाइट्स या अपार्टमेंटकडे रवाना झाला आहे. त्याने कोणतीही प्रतिक्रिया दिलेली नाही. यावेळी सैफच्या गळ्याला जखमेवर पट्टी लावलेली दिसली. तर हाताच्या पंजाला देखील प्लास्टर पट्टी केलेली बघायला मिळाली आहे.