गुंड निलेश घायवळ याच्या भावाला गुन्हेगारी रेकॉर्ड असूनही बंदुकीचा परवाना दिल्याचा आरोप राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी केला आहे. तसेच या प्रकरणात आता त्यांनी भाजप नेते राम शिंदे आणि शिंदेंच्या शिवसेनेचे नेते तानाजी सावंत यांचीही नावं घेतली आहेत.

निलेश घायवळचे संतोष बांगर आणि तानाजी सावंत यांच्यासोबत हितसंबंध असल्याचा आरोपही रोहित पवार यांनी केला आहे. निलेश घायवळच्या भावाचे गुन्हेगारी रेकॉर्ड असूनही त्याला बंदुकीचा परवाना दिला गेला. कारण वरिष्ठ स्तरावर लोक गुंतलेले आहेत, त्यात राम शिंदे आणि गृहविभागाचा समावेश असू शकतो, असंही रोहित पवार म्हणाले.

काय म्हणाले रोहित पवार?

संतोष बांगरचं नाव चर्चेत आहे. त्यांचे फोटो अधिवेशनात निलेश घायवळसोबत दिसतात. सभापती राम शिंदे, घायवळ, बांगर हे सर्व लोक सहजपणे निलेश घायवळला घेऊन तिथं अधिवेशनात दिसतात. ज्या पवनचक्क्या असतात, तिथं जमिनी घेतल्या जातात, शेतकऱ्यांना धमक्या दिल्या जातात. त्याच्यात निलेश घायवळ आणि त्याच्या गँगचा हात आहे. त्याला तानाजी सावंत हे स्वतः नाही, पण त्यांच्या कुटुंबातील काही लोकांचं नक्कीच पाठबळ आहे, असा दावाही रोहित पवारांनी केला.