थ्री इडियट सिनेमामध्ये रँचो प्रसूती करतो हे सगळ्यांनीच बघितले आहे. मात्र मुंबईमध्ये देखील एका मराठमोळा रँचोने सगळ्यांचेच मन जिंकून घेतले आहे. त्याचं कारण असं की, काल रात्री 12.40 च्या सुमारास गर्भवती महिला गोरेगाव रेल्वे स्थानकावरून मुंबईकडे लोकल ट्रेनने प्रवास करत होती. प्रवास करत असताना अचानक तिला प्रसूती वेदना सुरू झाल्या. ती मदतीसाठी हाक देत ओरडू लागली. यावेळी त्याच डब्यातून प्रवास करणारा विकास दिलीप बेंद्रे याने ट्रेन थांबवण्यासाठी चैन ओढली.

त्यानंतर या तरुणाने त्याची मैत्रीण डॉ देविका देशमुख यांना व्हिडिओ कॉल केला आणि सगळी परिस्थिति दाखवली. यावेळी डॉक्टर म्हणाले की, विकास आता तुलाच ही प्रसूती करायची आहे. जय श्री राम म्हण आणि मी जे सांगते ते कर त्याने ही संपूर्ण प्रक्रिया स्टेप बाय स्टेप समजून घेतली. विकास बेंद्रे यांनी परिस्थितीचे गांभीर्य समजून कोणताही वैद्यकीय ज्ञानाचा अनुभव नसतानाही डॉक्टरांनी सांगितलेल्या प्रत्येक सुचनांचे पालन करत ही प्रसूती यशस्वीरित्या पार पडली. हा व्हिडिओ सध्या सोशल मीडियावर जोरदार व्हायरल होत असून सर्वचजन या विकास आणि डॉक्टरांवर कौतुकाचा वर्षाव करत आहे.