Mahayuti Conflict : महायुतीत एकमेकांच्या पक्षातील पदाधिकारी आणि कार्यकर्त्यांची आयात थांबवावी असा निरोप दिल्लीतून आल्यानंतरही भाजपनं शिंदेंना धक्का देणं सुरूच ठेवलं आहे. ठाण्यातील डोंबिवलीत भाजप प्रदेशाध्यक्ष रवींद्र चव्हाण यांनी शिवसेनेच्या दोन प्रभावी स्थानिक नेत्यांना आपल्या पक्षात प्रवेश दिला आहे. यामध्ये आता शिवसेना आणि भाजप यांच्यातील मतभेद वाढण्याची शक्यता आहे. काही दिवसात राज्यात महापालिकेच्या निवडणुका लागणार आहेत. त्याआधी भाजप अन् शिंदे सेना यांच्यात धुसफूस सुरू आहे.

शिवसेनेचे कल्याण ग्रामीण उपतालुकाप्रमुख विकास देसले आणि नेते सदानंद थरवळ यांचा मुलगा अभिजित थरवळ यांनी भाजपात प्रवेश केला आहे. या पक्षप्रवेशामुळे अस्वस्थ झालेल्या उपमुख्यमंत्री एकनाथ शिंदे यांच्या शिवसेनेच्या मंत्र्यांनी थेट मंत्रिमंडळाच्या बैठकीवर बहिष्कार टाकल्याची माहिती समोर येत आहे. या फुटाफुटीच्या राजकारणामुळे महायुतीत पुन्हा एकदा तणाव निर्माण झाला आहे.