भाजपच्या प्रदेशाध्यक्ष पदी रवींद्र चव्हाण यांची नियुक्ती होणार असल्याचं आता जवळपास निश्चित झालं आहे, अशी माहिती सूत्रांनी दिली आहे. मात्र त्याची अधिकृत घोषणा कधी होणार याबाबत अद्याप अनिश्चितता आहे. रविंद्र चव्हाण यांची नियुक्ती तातडीने होईल की स्थानिक स्वराज्य संस्थांच्या निवडणुका झाल्यानंतर यासंदर्भात अजून कोणतीही माहिती समोर आलेली नाही. भाजपा महापालिका आणि नगरपालिका निवडणुकांचं रणशिंग शिर्डीतल्या अधिवेशनातून 12 जानेवारीला फुंकणार आहे. याच अधिवेशनात रवींद्र चव्हाण यांच्या नावाची घोषणा होणार का, याची उत्सुकता आहे. चव्हाण यांना आताच प्रदेशाध्यक्ष केलं तर आगामी पालिका निवडणुकांची तयारी करण्यास त्यांना पुरेसा वेळ मिळेल, असंही म्हटलं जात आहे. तर बावनकुळेंकडे यांच्याकडे निवडणुका होईपर्यंत प्रदेशाध्यक्षपद कायम ठेवावं, असाही एक प्रवाह भाजपमध्ये असल्याचं सूत्रांनी सांगितलं आहे. त्यामुळे रविंद्र चव्हाण हेच भाजपचे प्रदेशाध्यक्ष होणार असल्याचं जवळपास निश्चित झालं आहे. मात्र ते पालिका निवडणुकांच्या आधी की नंतर हे पहाणं आता महत्वाचं ठरणार आहे.