मनसेच्या इगतपुरी येथील दुसऱ्या दिवसाच्या शिबिरात आज सकाळचे सत्र संपन्न झाले. या सत्रात आगामी स्थानिक स्वराज्य संस्थांच्या निवडणुकांची रणनीती आखण्यात आली. पक्षप्रमुख राज ठाकरे यांनी सकाळच्या सत्रात उपस्थित नेते आणि पदाधिकाऱ्यांना मार्गदर्शन करत निवडणुकीच्या तयारीला तात्काळ सुरुवात करण्याचे आदेश दिले. राज यांनी स्पष्टपणे सांगितले की, उद्धव ठाकरेंच्या युतीबाबत योग्य वेळी निर्णय घेऊ, तोपर्यंत निवडणूक तयारी थांबवू नका. त्यांनी मतदार याद्यांचे बारकाईने विश्लेषण करण्याचे, तसेच याद्यांमधील दुबार नावे शोधण्याचे निर्देश पदाधिकाऱ्यांना दिले. दुपारच्या सत्रात त्यांनी नेते आणि पदाधिकाऱ्यांशी सविस्तर चर्चा केली. त्यानंतर राज ठाकरे इगतपुरीहून मुंबईच्या दिशेने रवाना झाले. शिबिराच्या संध्याकाळच्या सत्राचे नेतृत्व मनसे नेते बाळा नांदगावकर करणार आहेत.