मी भाजपच्या लोकाना किंवा इतर पक्षाच्या राजकारण्यांना भेटू नये असं काही लोकांचं म्हणण आहे. राजकीय नेते पूरणी एकमेकांना सहज भेटू शकत होते. आता सगळ लपून छ्पुन सुरू असतं. पक्षाचा विरोध, पक्षाची धोरणं यात कधीही तडजोड होणार नाही. पण म्हणून वैर घेतल्यासारखं वागावं असं नाही, असं मनसे अध्यक्ष राज ठाकरे यांनी म्हंटलं आहे. आज महाराष्ट्र नवनिर्माण सेनेचा राज्यस्तरीय पदाधिकारी मेळावा मुंबईत झाला. त्यात ते बोलत होते. यावेळी भाजप नेते चंद्रकांत पाटील यांच्यासोबतच्या बैठकीचा एक गंमतीदार किस्सा राज ठाकरेंनी आपल्या भाषणात सांगितला. हा किस्सा सांगताना राज ठाकरेंनी चंद्रकांत पाटील यांची नक्कल केल्याने उपस्थितांमध्ये चांगलाच हशा पिकला होता.

यावेळी बोलताना राज ठाकरे म्हणाले की, मी एकदा नाशिकच्या दौऱ्यावर होतो. समोरून चंद्रकांत पाटील आले. मुंबईत आलो की येतो चहा प्यायला, असं त्यांनी म्हटलं. अशी परिस्थिती तुमच्यावर आली तर तुम्ही काय कराल? त्यानंतर चंद्रकांत पाटील मला माझ्या घरी भेटण्यास आले. माझ्याशी चर्चा करून बाहेर पडले. त्यांना पत्रकारांनी विचारले काय झाले? तर आपण काय सांगू सहज चर्चा झाली. पण चंद्रकांत पाटील यांनी बाहेर पडल्यानंतर पत्रकारांपुढे काय केले असेल? असं विचारत राज ठाकरे यांनी उजवा हात वर करत आपल्या दंडाची बेटकुळी काढून दाखवली आणि चंद्रकांत पाटील यांची नक्कल केली. त्यामुळे एकच हास्यकल्लोळ झाला. यावर पुढे ठाकरे म्हणाले की, त्यांच्या या हावभावाचा अर्थ काय होता हे मला कळला नाही. त्यांनी मला कडेवर घेतलं होतं की त्याचा इतर काही अर्थ होता हेच मला अजून समजलेलं नाही. काय म्हणजे, मी इथे (कोपराजवळ) आक्रोड ठेवले होते आणि त्यांना ते फोडून दिले का? बर मी त्यांची ही कृती पाहिली नव्हती. त्यामुळे पत्रकारांनी येऊन मला त्यांची नक्कल करून दाखवत त्याचा अर्थ विचारला तर मीच त्यांना विचारतोय असं केलं म्हणजे काय झालं? असं म्हणत ठाकरेंनी हा किस्सा सांगितला.

दरम्यान, मी कोणालाही भेटलो तरी माझ्या मराठीचा बाणा हा कायम आहे. तो मी बोथट करत नाही. आपल्याला महाराष्ट्रासाठी इथल्या माणसांसाठी जे करायचं आहे, ते आपण करणारच आहोत. माझ्यासोबत राहायचं असेल तर ठाम रहा, खचलेल्या पिचलेल्या लोकांचं नेतृत्व मला करायचं नाही, असंही राज ठाकरे म्हणाले.