मुंबई: मनसे अध्यक्ष राज ठाकरे यांनी आज मुंबईतील पक्षाचे नेते व पदाधिकाऱ्यांची महत्त्वपूर्ण बैठक घेऊन आगामी मुंबई महापालिका निवडणुकीच्या तयारीसंदर्भात मार्गदर्शन केलं. राज ठाकरे यांनी स्पष्ट केलं की, मुंबईत तळागाळात खरी ताकद फक्त शिवसेना (उद्धव बाळासाहेब ठाकरे) आणि मनसेचीच आहे. बाकी पक्षांचा प्रभाव एवढा नाही. बैठकीत गटाध्यक्ष आणि इतर वरिष्ठ पदाधिकाऱ्यांना विशेष जबाबदाऱ्या देण्यात आल्या असून, तातडीने निवडणुकीच्या कामाला लागण्याच्या सूचना देण्यात आल्या. यामध्ये मतदार याद्या तपासणे, संघटन मजबूत करणे आणि प्रभागनिहाय रणनीती आखणे या बाबींचा समावेश आहे. 2017 पासून मतदार याद्यांतील घोळाबाबत मनसे सातत्याने बोलत असल्याचं राज ठाकरे यांनी सांगितलं. आता बाकीचे पक्षही हा विषय घेतायत, विरोध करण्यासाठी हा मुद्दा योग्य आहे, असंही ते म्हणाले.