मुंबई महापालिका निवडणुकीच्या पार्श्वभूमीवर मनसेला सोबत घेण्यावरून काँग्रेसमध्ये मतभेद उघड झाले आहेत. काँग्रेस नेते विजय वडेट्टीवार यांनी भाजपचा पराभव करण्यासाठी मनसेसोबत आघाडी करण्यास सकारात्मकता दर्शवली आहे. तर मुंबई काँग्रेस अध्यक्ष वर्षा गायकवाड यांनी याला तीव्र विरोध केला आहे. मारहाणीची भाषा करणारे सोबत नकोत, अशी ठाम भूमिका वर्षा गायकवाड यांनी मांडली आहे. गायकवाड यांनी काँग्रेसची विचारधारा समता, बंधुत्व आणि न्यायावर आधारित असून, कायदा हातात घेणाऱ्यांसोबत युती शक्य नसल्याचे स्पष्ट केले. दुसरीकडे, विजय वडेट्टीवार यांनी मनसेसोबत वैचारिक मतभेद असले तरी, भाजपसारख्या शक्तीला रोखण्यासाठी एकत्र येणे आवश्यक असल्याचे मत व्यक्त केले. शरद पवार यांनीही आघाडीत लढण्याची भूमिका घेतल्याचे वडेट्टीवार यांनी नमूद केले, ज्यामुळे काँग्रेसमधील अंतर्गत वाद समोर आला आहे.