Sindhudurg Rain : कोकणातील नागरिकांना सध्या 'हिवसाळ्या'चा अनुभव घ्यावा लागत आहे. हिवाळ्यात थंडीबरोबरच पावसानंही हजेरी लावली आहे. फेंगल चक्रीवादळाचा हा परिणाम असल्याचे सांगण्यात येत आहे. सिंधुदुर्ग जिल्ह्यातील काही भागांत संध्याकाळच्या सुमारास पावसाच्या सरी कोसळल्या.

जिल्ह्यातील काही भागांत अवकाळी पावसामुळं नागरिकांची तारांबळ उडाली. काही भागात जोरदार पाऊस झाला. तर काही ठिकाणी नुसतीच पावसाची सर येऊन गेली. कुडाळ, सावंतवाडी भागात ढगांच्या गडगडाटासह जोरदार पाऊस कोसळला. या अवकाळी पावसामुळं मात्र येथील बागायतदार शेतकरी चिंतातूर झाला आहे. या अशा अवकाळी पावसामुळं आंबा, काजू मोहरावर परिणाम होण्याची भीती शेतकऱ्यांनी व्यक्त केली आहे.