मतदार याद्यांमधील कथित अनियमितता आणि निवडणूक आयोगाच्या (ECI) कार्यपद्धतीविरोधात आक्रमक भूमिका घेत, विरोधी पक्षनेते राहुल गांधी यांच्यासह 'इंडिया' (INDIA) आघाडीच्या ११ प्रमुख नेत्यांनी सर्वोच्च न्यायालयात धाव घेतली आहे. मुख्य निवडणूक आयुक्तांच्या विरोधात दाखल करण्यात आलेल्या या संयुक्त याचिकेत निवडणूक आयोगाचे कामकाज आणि विशेष मतदार यादी पुनरीक्षण (SIR) प्रक्रियेवर गंभीर आक्षेप घेण्यात आले आहेत. मात्र, सर्वोच्च न्यायालयात दाखल होताच या याचिकेत तब्बल १४ त्रुटी (Defects) असल्याचे न्यायालयाच्या रजिस्ट्रीकडून निदर्शनास आणून देण्यात आले. तांत्रिक बाबींची पूर्तता न झाल्याने याप्रकरणी तातडीने सुनावणी होण्याची शक्यता तूर्तास मावळली आहे.