विधानसभा निवडणुकीच्या ऐन तोंडावर काँग्रेस नेते राहुल गांधी यांचा महाराष्ट्र दौरा झाला आहे. काँग्रेस नेते राहुल गांधी शनिवारी सकाळी कोल्हापूरच्या दौऱ्यावर पोहोचले. या दौऱ्यात त्यांनी छत्रपती शिवाजी महाराज यांच्या पूर्णाकृती पुतळ्याचे अनावरण केलं. यावेळी आपल्या भाषणात त्यांनी मोदी आणि महायुती सरकारवर टीकास्त्र डागलेलं दिसलं.

विचारधारा एकच आहे. त्यात कोणताही फरक नाही. ही राजकीय लढाई नाही, ही विचारधारांची लढाई आहे. ही संविधानाची लढाई आहे. त्यामुळे यापुढे तुमच्याकडे कुणी येऊन म्हणालं की, मी शिवाजी महाराजांना मानतो. तेव्हा तुम्ही त्यांना संविधान वाचवण्यावर प्रश्न विचारा. गरिबांच्या सुरक्षेचा प्रश्न विचारा. त्याने नाही, असे उत्तर दिले. तर त्या व्यक्तीने पुतळ्यापुढे हात जोडण्याला काही अर्थ नाही. महाराष्ट्रातील जनतेला हे चांगल्याप्रकारे माहिती आहे. संविधानात शिवाजी महाराजांचे विचार आहेत. त्यांना हा विचार महाराष्ट्राच्या मातीतून, जनतेतून मिळाला. मी जेव्हा महाराष्ट्रात येतो तेव्हा मला येथील जनतेच्या चेहऱ्यावर, त्यांच्या कर्मात, त्यांच्या मनात शिवाजी महाराजांचे विचार दिसून येतात, असंही राहुल गांधी यांनी म्हंटलं आहे.