पुणे पोलिसांनी गुंड निलेश घायवळविरोधात कारवाई अधिक घट्ट केली आहे. पोलिसांनी कोथरूड परिसरातील त्याच्या घरावर छापा टाकत बंदुकीच्या गोळ्या, सातबारे, साठेखत आणि विविध जमिनींची कागदपत्रं जप्त केली आहेत. यासोबतच मराठवाड्यातील पवनचक्की प्रकल्पासंबंधीच्या फाइल्सही पोलिसांच्या हाती लागल्या आहेत. दरम्यान, घायवळच्या नावावर असलेल्या अनधिकृत बांधकामे आणि मालमत्तांची चौकशी होणार आहे. पुणे महानगरपालिकेनेही या प्रकरणी कारवाईची तयारी केली असून अनधिकृत बांधकामे तसेच थकीत कर असलेल्या मालमत्तांवर जप्तीची प्रक्रिया राबवली जाणार आहे. पोलिस आणि महापालिकेच्या संयुक्त कारवाईमुळे घायवळविरोधातील कारवाईत आणखी गती येण्याची शक्यता आहे.